Vegadeo acollerá un ciclo de cafés tertulia para familias sobre educación, tecnoloxía e saúde adolescente
O salón de actos do IES Elisa y Luis Villamil de Vegadeo converterase durante a primavera nun espazo de reflexión e aprendizaxe para as familias grazas ao ciclo “Café tertulia en familia”, unha proposta pensada para abordar diferentes cuestións relacionadas coa educación, a convivencia e o uso das novas tecnoloxías entre a mocidade.
A actividade está especialmente dirixida a pais, nais, avós e persoas coidadoras, que poderán participar nestes encontros pensados para favorecer o diálogo, resolver dúbidas e compartir información útil sobre cuestións que afectan á infancia e á adolescencia na actualidade.
O programa desenvolverase en catro sesións, que terán lugar entre os meses de abril e maio no salón de actos do instituto, sempre en horario de 17:00 a 18:30 horas. Cada encontro contará coa participación de profesionais especializados que ofrecerán explicacións e orientacións prácticas ás persoas asistentes.
A primeira cita será o xoves 9 de abril coa charla titulada “Prevención de acoso e ciberacoso escolar”, que estará impartida por Arancha López López, gardia civil do posto de Vegadeo. Nesta sesión abordaranse diferentes aspectos relacionados coa detección e prevención destas situacións, así como o papel das familias á hora de actuar ante posibles casos.
O ciclo continuará o xoves 23 de abril coa conferencia “Educar con IA: sesgos y desinformación”, a cargo de Juan García Álvarez de Toledo, consultor de estratexia dixital en GAM e formador en competencias dixitais e ciberseguridade. Durante esta intervención analizaranse os retos que supón o uso da intelixencia artificial no ámbito educativo e familiar.
O mesmo relator será tamén o encargado da terceira sesión, prevista para o xoves 7 de maio, baixo o título “Uso seguro e responsable de videojuegos”. Nesta ocasión falarase sobre os hábitos de consumo dixital da mocidade, así como sobre as ferramentas que poden empregar as familias para fomentar un uso equilibrado e seguro dos videoxogos.
A última das xornadas terá lugar o xoves 21 de maio e estará centrada na temática “Salud y adolescencia”. A charla será impartida por Alejandra Langa Fernández, directora do Centro de Saúde de Vegadeo-Castropol-San Tirso-Figueras, quen abordará distintos aspectos relacionados co benestar físico e emocional nesta etapa da vida.
As persoas interesadas en participar poderán formalizar a súa inscrición a través do formulario habilitado pola organización. Ademais, entre as persoas asistentes realizarase o sorteo dun premio para desfrutar en familia, co obxectivo de incentivar a participación neste ciclo de encontros.
A iniciativa conta coa colaboración de diferentes entidades e busca ofrecer ás familias ferramentas e coñecementos que lles permitan afrontar con maior seguridade os desafíos educativos e sociais que xorden no día a día.