Unha ruta interpretativa lembrará o percorrido do tren mineiro en Ribadeo
O concello de Ribadeo converterase o vindeiro domingo 28 de setembro no escenario dunha ruta interpretativa que percorrerá o antigo trazado do tren mineiro da Sociedade Mineira de Villaodrid. A cita, organizada polo CIT A Pontenova, enmárcase dentro dos actos do 125 aniversario desta entidade histórica.
A xornada dará comezo ás 09.00 horas coa concentración dos participantes na Praza dos Fornos, onde se repartirán mochilas conmemorativas, auga e un pequeno petisco. A continuación, ás 09.15 horas, os asistentes desprazaranse en autobús ata o cargadoiro de Porto Estreito, punto de inicio dun percorrido de 4,1 quilómetros catalogado de baixa dificultade.
O itinerario permitirá descubrir, cun enfoque interpretativo, o trazado que seguiu o tren mineiro na súa conexión con Ribadeo, ofrecendo explicacións sobre a relevancia histórica e patrimonial destas infraestruturas. A actividade culminará arredor das 14.30 horas cun xantar na cafetería da Casa da Cultura, á base de pinchos e bebidas variadas.
As prazas están limitadas a 30 participantes e cubriranse por orde de inscrición. O prazo para apuntarse remata o venres 26 de setembro e o prezo da actividade é de 30 euros, que inclúe a mochila conmemorativa, transporte en autobús, comida e seguro de responsabilidade civil. As persoas interesadas deben inscribirse a través do teléfono ou whatsapp habilitado pola organización.