Unha iniciativa busca reivindicar o papel de Mondoñedo no Camiño de Santiago
O proxecto “De Catedral a Catedral”, nacido por iniciativa popular e respaldado polo comercio, a hostalería e a restauración local, así como polas institucións autonómicas e locais e as dioceses de Mondoñedo-Ferrol e Santiago, bota a andar este venres 11 de abril cunha presentación oficial en Mondoñedo.
A Casa dos Coengos, dentro da Catedral mindoniense, acollerá o acto de lanzamento ás 11:00 horas, nun evento aberto ao público no que participarán representantes da directiva da xestora do proxecto e autoridades civís e eclesiásticas. A creación desta marca busca reforzar a conexión histórica e cultural entre as dúas únicas catedrais galegas do Camiño Norte, ao tempo que pretende recuperar o espírito orixinal da peregrinación a Compostela.
Desde “De Catedral a Catedral” destacan que o Camiño de Santiago naceu como unha peregrinación vinculada á cristiandade e á cultura europea, e lembran que Mondoñedo foi durante séculos un punto clave nas rutas de tránsito costeiras e interiores, converténdose en parada obrigada para viaxeiros, mercadorías e ideas. Neste sentido, a nova marca quere reivindicar o papel de Mondoñedo como referencia dentro das vías de comunicación galegas e como parte fundamental do trazado histórico que vertebrou Europa.
A iniciativa pon o foco en promover o tramo final do Camiño Norte, que conecta Mondoñedo con Santiago a través de sete etapas que atravesan os concellos de Abadín, Vilalba, Baamonde, Sobrado dos Monxes, Arzúa e O Pino, antes de chegar á capital galega. Un percorrido que permitirá aos peregrinos descubrir a riqueza patrimonial e paisaxística de Galicia, ofrecendo unha nova forma de achegarse a este eixo fundamental do occidente europeo.
Os impulsores do proxecto animan a toda persoa interesada a asistir á presentación oficial e coñecer de primeira man os detalles desta iniciativa, que aspira a converterse nun referente na promoción do Camiño Norte e do seu legado histórico.