Un veciño de 90 anos falece en Sumoas tras agardar máis de cincuenta minutos por atención médica
Toñi, veciña de Sumoas, no concello de Xove, conta con indignación e tristeza como o seu pai, de 90 anos, perdeu a vida o pasado martes 19 de agosto tras sufrir unha parada cardíaca mentres esperaba pola chegada dunha ambulancia.
Segundo relata, todo comezou ás 08.10 horas cando lle deu o almorzo ao seu pai e notou que tiña problemas para respirar. “Chamei ao centro de saúde e nese momento aínda tiña pulso e saturación, pero decateime de que estaba sufrindo un infarto”, explica. Desde o centro déronlle instrucións para contactar co 061, xa que naquela mañá non había médico de garda en Xove.
Ás 08.40 horas fixo a chamada de urxencia e mesmo lle pasou o teléfono ao seu pai para que os profesionais puidesen comprobar a gravidade da súa respiración. “Confirmáronme que se trataba dunha parada e pedíronme que o incorporase e que abrira a ventá para que entrase aire. Dicíanme que me mandaban unha ambulancia e un médico”, relata.
Porén, a espera fíxose longa. “Como vin que tardaban moito, volvin chamar e dixeronme que xa estaban chegando a Xove”, explicou. Finalmente, a ambulancia chegou ao domicilio ás 09.30 horas, unha hora despois da primeira alerta. A muller critica que o vehículo tivera que recoller primeiro ao médico no centro de saúde de Burela e despois ao enfermeiro no de Xove, o que provocou unha perda de tempo que considera “determinante”.
A pesar da demora, Toñi quere agradecer o esforzo dos profesionais sanitarios que interviron. “Non teño máis que boas palabras para eles, fixeron todo o posible, pero non puideron salvar a vida do meu pai”, recoñece.
O home, que padecía problemas cardíacos, renais, diabetes e insuficiencia respiratoria, era consciente da súa delicada situación de saúde. Porén, a súa filla insiste en que o falecemento non so se produciu polas enfermidades senón polo retraso na atención. “Con 90 anos podía pasarlle en calquera momento, pero non así, non por ter que esperar porque non hai médicos dispoñibles”, lamenta.
Toñi cuestiona con dureza o funcionamento do sistema sanitario na Mariña. “Non pode ser que nas ambulancias teñan que ir recollendo profesionais polo camiño. O sistema non funciona. O martes non había médico no centro de saúde, e o mércores tampouco”, denuncia.