Un alumno do IES Perdouro viaxará a China para representar a España na Olimpíada Internacional de Xeoloxía
O estudante burelao Hugo Gorgojo Basanta, alumno do IES Perdouro, converterase este verán nun dos embaixadores da xeoloxía española na Olimpíada Internacional de Xeoloxía, que terá lugar en Ji’ning (China) entre o 7 e o 17 de agosto.
O mozo acadou a súa clasificación tras situarse entre os catro primeiros postos na fase final da olimpíada estatal, celebrada esta fin de semana en Tremp (Lleida), demostrando o seu talento e coñecementos nunha disciplina que combina ciencia, investigación e paixón pola Terra.
Xunto a el, completan o equipo español Santiago Otero, do colexio Peleteiro de Santiago de Compostela; Samuel Martín, de Salamanca; e Fernando Juez, de Badaxoz.
Desde a comunidade educativa do centro burelao celebraron con orgullo a nova, destacando o traballo e dedicación de Hugo ao longo do curso. A súa participación nesta prestixiosa cita internacional sitúa de novo ao IES Perdouro e ao ensino público galego no mapa da excelencia académica.