Ultramar regresa no Festival Osa do Mar con cine e música como protagonistas
O Festival Osa do Mar de 2025 traerá consigo o regreso da Mostra de Cinema ULTRAMAR, unha iniciativa impulsada polo cineasta burelés Adrián Canoura e o produtor Brais Romero. A proposta funcionará como preludio das xornadas centrais do festival, ofrecendo dúas proxeccións que combinan o poder da música e do audiovisual.
Segundo explican os organizadores, ULTRAMAR volve coa intención de consolidarse como un espazo de encontro na Mariña Lucense, unindo sinerxías co tecido cultural da zona e apostando por unha programación aberta á diversidade e á exploración creativa.
A primeira sesión terá lugar o mércores 3 de setembro, coa exhibición de All Tomorrow’s Parties. O filme propón unha viaxe caleidoscópica pola historia e o ambiente do lendario festival británico, no que participaron artistas como Patti Smith, Portishead, Belle and Sebastian ou Sonic Youth.
O xoves 4 de setembro será a quenda de Kumo kosa ta? Recuerdos de Palenque, unha produción que documenta a experiencia do grupo galego Baiuca en Colombia, centrada no seu traballo co Observatorio Transoceánico en San Basilio de Palenque, unha das comunidades afrodescendentes máis singulares do país. Tras a proxección, membros da banda compartirán impresións nun coloquio co público.