Trabada transforma a antiga escola de Vilapercide en vivenda social
O Concello de Trabada asina hoxe o contrato de alugueiro coa familia que pasará a residir na vivenda rehabilitada da antiga escola de mestres de Vilapercide, dentro da súa aposta por transformar antigas escolas en vivenda social. Esta medida súmase ás catro vivendas xa recuperadas e ocupadas noutros núcleos: Sante, Trabadela, Vidal e, proximamente, Valboa, que tamén sairá ao mercado de alugueiro social.
O alcalde, Rubén García, destacou que “seguimos comprometidos en recuperar antigas escolas para darlles un novo uso social, ofrecendo solucións á dificultade de acceder a unha vivenda e contribuíndo á fixación de poboación no rural, revitalizando as nosas parroquias”.
A vivenda de Vilapercide xerou un notable interese, e finalmente será unha familia con nenos a que se instale, incrementando así o número de escolares matriculados no municipio neste curso. García avanzou que novos proxectos están en preparación para rehabilitar as escolas que aínda restan, sempre con vistas a poñelas á disposición da veciñanza en réxime de alugueiro social.
Con esta iniciativa, o Concello consolida un modelo que combina a valorización do patrimonio público co apoio ás familias e a loita contra o despoboamento rural.