Trabada prepárase para unha gran noite de festa e música
O Concello de Trabada organiza unha gran festa o vindeiro sábado 10 de maio na Praza do Concello, cunha noite chea de música e diversión para todos os públicos maiores de idade. O evento dará comezo ás 23:00 horas e contará coa actuación estelar da Orquestra New York, dentro da súa xira Un paso adelante, ademais dunha sesión especial do DJ convidado Marcos Magán.
A celebración terá lugar nun recinto cuberto con carpa para garantir a comodidade dos asistentes, independentemente das condicións meteorolóxicas. O alcalde, Rubén García, destacou a relevancia desta cita dentro do calendario festivo local: “Esta festa era coñecida como a Festa da Xuventude, pero agora ampliamos a súa proposta para que todos os maiores de idade poidan gozar das mellores orquestras nunha data diferente ás festas patronais, que son máis complicadas de organizar.”
A festa está organizada co apoio da Comisión de Festas de Trabada, Gaias Eventos e Promociones Artísticas Vázquez. Desde o Concello anímase a toda a veciñanza e visitantes a asistir e desfrutar dunha noite inesquecible de música en directo, animación e bo ambiente.