Trabada prepárase para a súa primeira gran concentración moteira
A paixón polas motos tomará Trabada os días 21 e 22 de xuño coa I Concentración Moteira, un evento que reunirá afeccionados ás dúas rodas para desfrutar dunha fin de semana chea de emoción e actividades. Organizada polo Motoclube A Cadeira, a cita promete espectáculos de habilidade, percorridos turísticos e unha ampla oferta lúdica e gastronómica.
O sábado 21 arrancará coa apertura de inscricións ao mediodía, seguida dunha sesión vermú musical. Pola tarde, haberá un simulador de pilotaxe de MotoGP Ducati e unha exhibición de acrobacias a cargo do recoñecido Emilio Zamora. A xornada culminará cunha cea no recinto cuberto e unha verbena a cargo dos grupos La Tremenda e The Sound Project.
O domingo 22 comezará cun almorzo para os participantes, seguido dunha ruta turística con pincho e unha nova sesión vermú con DJ. O evento pecharase cun xantar e a entrega de premios e sorteos.
As inscricións inclúen diferentes opcións, con descontos para socios do motoclub. Os asistentes tamén poderán gozar de food trucks, servizo de taxi e zonas de acampada. Unha fin de semana irrepetible para os amantes do motor en Trabada.