Trabada entrega as primeiras vivendas rehabilitadas en alugueiro social
O Concello de Trabada asinou o contrato e a entrega das primeiras vivendas rehabilitadas en réxime de alugueiro social como mostra do seu compromiso por facilitar o acceso á vivenda.
As adxudicatarias xa poden acceder aos inmobles e habitalos, nun proxecto que leva anos en marcha e que ten como obxectivo ofrecer alternativas residenciais para a poboación.
Este plan de rehabilitación ten como fin recuperar antigas vivendas municipais e poñelas a disposición dos veciños a prezos accesibles.
O alcalde de Trabada, Rubén García, destacou que "levamos anos traballando para recuperar e rehabilitar as antigas vivendas municipais, e seguiremos avanzando para ampliar a oferta de alugueiro social en Trabada".
O Concello continuará con esta liña de actuación, reformando as vivendas das antigas escolas e outros inmobles municipais, co propósito de facilitar o acceso á vivenda e fixar poboación no municipio.
Así mesmo, unha vez rematadas as reformas pendentes e acadada a financiación necesaria, o goberno local ten previsto ampliar este proxecto coa adquisición de novas vivendas para a súa rehabilitación e posterior oferta en alugueiro social.