Trabada acollerá en xuño a segunda concentración moteira cun amplo programa de actividades
Trabada converterase nun punto de encontro para os amantes do motor coa celebración da segunda edición da súa concentración moteira, unha cita que terá lugar entre os días 19 e 21 de xuño de 2026 na explanada do parque. O evento, impulsado polo Motoclube A Cadeira, presenta un completo programa de actividades pensado para atraer tanto a participantes como a público xeral.
A programación dará comezo o venres pola tarde coa apertura das inscricións, seguida da recollida para a cea das persoas inscritas. Xa pola noite, os asistentes poderán participar nunha subida ao monólito da Cadeira, unha das propostas destacadas da xornada, que culminará cunha verbena amenizada por distintas formacións musicais.
O sábado será o día con maior concentración de actividades. Dende a mañá retomaranse as inscricións e celebrarase unha sesión vermú, antes de dar paso a propostas gastronómicas e de lecer. Entre as novidades desta edición destaca a instalación de simuladores de pilotaxe de Moto GP, así como unha exhibición de acrobacias sobre moto que contará cunha rider profesional, sendo esta unha das grandes apostas da organización. A xornada completarase cunha cea popular e unha nova verbena nocturna.
Xa na madrugada terá lugar unha homenaxe aos moteiros falecidos, un momento emotivo dentro dun programa marcado pola convivencia e a paixón polas dúas rodas.
O domingo estará centrado nun ambiente máis relaxado, con almorzo colectivo, unha ruta turística libre con parada para pincho e unha sesión vermú na que tamén se realizarán sorteos e entrega de premios. A cita pecharase cunha comida de despedida para as persoas participantes.
A organización habilitará zona de acampada gratuíta, tanto cuberta como ao aire libre, e complementará a oferta con servizos de restauración a través de food trucks, churrería e postos de merchandising, ademais de servizo de taxi para facilitar os desprazamentos.
Con esta nova edición, Trabada consolida unha cita que combina ocio, música e motor, reforzando a súa capacidade para atraer visitantes e dinamizar a actividade durante a fin de semana.