Trabada abre a tempada de sendeirismo cunha ruta polo Camiño Norte de Santiago
O Concello de Trabada, en colaboración coa asociación de sendeirismo Trabada Paso a Paso, poñerá en marcha a primeira das rutas programadas para este ano 2026 cun percorrido polo Camiño Norte de Santiago. A actividade marcará o inicio dun calendario que incluirá cinco propostas ao longo do ano destinadas a promover o deporte ao aire libre e a posta en valor da contorna natural.
A primeira cita terá lugar o domingo 29 de marzo e consistirá nun itinerario de aproximadamente oito quilómetros entre a localidade asturiana da Veiga e a Ría de Abres. Trátase dun percorrido de dificultade media que permitirá ás persoas participantes descubrir unha parte deste histórico itinerario xacobeo ao seu paso pola zona.
A saída está prevista para as 10.00 horas desde o centro social da Ría de Abres, punto de encontro desde o que se organizará o desprazamento e o inicio da camiñada. A actividade está aberta á participación da veciñanza e de todas aquelas persoas que desexen desfrutar dunha xornada de exercicio físico e contacto coa natureza.
As inscricións serán gratuítas e poderán formalizarse ata o 26 de marzo chamando ao Concello de Trabada no teléfono 982 135 011. Desde a organización lembran que será obrigatorio levar chaleco reflectante durante o percorrido por motivos de seguridade.
A ruta coincide ademais co inicio da primavera, unha época especialmente propicia para practicar sendeirismo e gozar das paisaxes da contorna. Desde o Concello animan á veciñanza a sumarse a esta proposta saudable que combina actividade física, convivencia e descubrimento do territorio.
Ao rematar a camiñada, as persoas participantes tamén terán a oportunidade de completar a xornada participando no Tapeo de Trabada, unha iniciativa gastronómica que permitirá degustar diferentes propostas culinarias nos establecementos da zona.