Balance da situación da covid-19 nas distintas comarcas da provincia de Lugo. Casos activos, contaxios e defuncións concello a concello.
A situación da pandemia da covid-19 mellora continuamente en Galicia. De feito, o comité clínico que asesora á Xunta decidiu aliviar restricións nos concellos lugueses de Vilalba e Monforte, que pasan a estar fóra de restricións. Si manterá o estado de alerta media o Concello de Xove, ao que se suma Viveiro, que baixa da alerta alta tamén á media.
Xunto a estes concellos lugueses, en Galicia só quedan tres en alerta media tamén, Mos, Oroso e Soutomaior. Os resto dos concellos galegos sitúanse en nivel medio baixo. Non hai polo tanto, ningún concello que teña que cumprir as restricións de nivel máximo ou de nivel alto. O comité volverase reunir o vindeiro martes para analizar, de novo, a situación epidemiolóxica de cada concello.
Todas estas medidas entrarán en vigor ás 00:00 horas do vindeiro sábado, 12 de xuño.
OS DATOS DE HOXE
O descenso de altas deixan o número de casos activos este mércores igual aos de onte, en 208 aínda que baixa o número de novos positivos e a hospitalización.
Na xornada anterior a baixada de casos foi de 16 por segundo día consecutivo, axudado polas moitas altas.
Diagnosticaron nas últimas 24 horas 7 casos novos (onte foron 6). As altas chegaron ás 11.552, 7 en 24 horas, cando onte foron 23.
Dende que comezou a pandemia, no mes de marzo do pasado ano, hai 12.981 casos rexistrados e 216 persoas falecidas.
A presión hospitalaria descende. Seguen 2 persoas ingresadas na UCI do Hula e hai 4 nas diferentes plantas (2 menos), 2 están no Hula (1 menos), 1 en Burela e 1 en Monforte (1 menos).
Os cambios de restricións por concellos quedarán dende o sábado do seguinte xeito:
- Máxima. Para incidencia maior de 500 casos por 100.000 habitantes.
- Alta. Para incidencia de 250 a 500.
- Media. Para incidencia de 150 a 250. Viveiro e Xove.
- Baixa. Por debaixo de 150. O resto da provincia.
POR COMARCAS
Continúa a mellora nas comarcas reducindo especialmente a situación nas localidades máis afectadas. Triacastela, Outeiro de Rei e Vicedo seguen con valores moi elevados.
A Mariña
- Viveiro reduce a 27 contaxios (1 menos).
- No Vicedo segue alta a incidencia aínda que por debaixo de dez casos.
- Xove ten 11 positivos e tamén alta a incidencia.
- Poucos casos tamén en Burela, Cervo e Alfoz.
- Foz, Ribadeo e O Valadouro están sen casos na última semana.
- Sen casos novos máis de 15 días están Ourol, A Pontenova, Riotorto, Barreiros, Trabada e Lourenzá. Únese Mondoñedo.
Terra Chá
- Vilalba reduce a 10 casos (1 menos).
- Outeiro de Rei mantén 11 contaxios e incidencia alta.
- Abadín reduce a incidencia e segue por debaixo de dez casos.
- Friol volve ter casos pero con baixa incidencia.
- As Pontes, Begonte, Cospeito e Meira non tiveron casos na última semana.
- Sen positivos dende hai máis de quince días están: Muras, Rábade, Castro de Rei, A Pastoriza, Xermade, Pol e Guitiriz.
Centro da provincia
- Os casos en Lugo soben 2 ata 65.
- Palas e O Corgo volven ter casos pero con baixa incidencia.
- Portomarín e Castroverde levan unha semana sen positivos.
- Limpos de covid nos últimos quince días están: Negueira de Muñiz, Baleira, Guntín, Antas de Ulla, Pedrafita, As Nogais, Baralla, Ribeira de Piquín, Becerreá, Cervantes, A Fonsagrada, Monterroso e Navia de Suarna.
Comarca de Sarria
- Sarria ten casos pero con moi baixa incidencia.
- Triacastela continúa cunha incidencia elevada.
- Samos, Paradela, O Páramo, Láncara e O Incio seguen limpos de covid dende fai dúas semanas polo menos.
Ribeira Sacra
- Monforte, Chantada e Taboada teñen casos pero con incidencia leve.
- Quiroga leva unha semana sen positivos.
- Sen casos en máis de quince días: Ribas de Sil, Bóveda, O Saviñao, Folgoso, Carballedo, Sober, Pantón e A Pobra de Brollón.
