Sargadelos manterá a súa actividade tras a rectificación de Segismundo García
O futuro da fábrica de Sargadelos parece asegurado tras a decisión do seu propietario, Segismundo García, de dar marcha atrás no peche da factoría. Esta mesma mañá, o empresario comunicou aos traballadores que non haberá despedimentos e que, previsiblemente, a vindeira semana retomarán a actividade.
Foron os propios operarios os que informaron aos medios de comunicación e aos representantes sindicais tras saír dunha reunión con García, que tivo lugar despois de que, ao comezo da xornada, atopasen as portas da fábrica pechadas. Segundo trasladaron os traballadores, o dono da empresa pediulles tempo para buscar unha solución ao conflito e aseguroulles que a suspensión da actividade respondía unicamente a cuestións de seguridade.
A pesar da incerteza inicial, os empregados decidiron permanecer no recinto ata a hora á que remata a súa quenda, para evitar posibles reclamacións sobre a súa ausencia no posto de traballo. Ademais, indicaron que non teñen previsto presentar denuncias, confiando en que se atope unha saída viable para o futuro da fábrica.
García tamén manifestou a súa intención de negociar con distintas institucións, entre elas a Consellería de Emprego, co conselleiro José González, con quen xa mantivo conversas, así como coa Inspección de Traballo, organismo que alertou sobre as 36 deficiencias que deben ser corrixidas na planta.