Sante prepárase para un domingo de lecer con puzzles e churrasco
A parroquia de Sante, no concello de Trabada, será escenario o vindeiro domingo 28 de setembro dunha xornada marcada polo xogo, a convivencia e a gastronomía. A Asociación Cultural e Deportiva San Xulián de Sante, coa colaboración doutras entidades, impulsa dúas actividades que prometen reunir veciñanza e visitantes arredor da diversión e da boa mesa.
Pola mañá, o polideportivo converterase no epicentro do III Concurso de Puzzles de Sante – Memorial Alba Rego Rodríguez, unha cita que gaña adeptos ano tras ano. Ás 10:00 horas arrincará a proba por parellas cun puzzle de 500 pezas, mentres que ás 12:00 será a quenda dos equipos, que deberán completar un de 1.000 pezas. As inscricións, cun prezo de 24 euros por parella e 36 por equipo, permanecerán abertas ata completar prazas, ofrecendo un desconto especial para socios de Aepuzz.
Xa pola tarde, a partir das 14:30 horas, a actividade trasládase ao teleclub, onde se celebrará o churrasco de fin de verán. O menú inclúe churrasco de porco, criollos, chourizo vermello, pan, bebida e sobremesa, cun prezo de 16 euros por persoa. Os menores de 8 anos poderán gozar da comida de forma gratuíta.
Desde a organización sinalan que esta dobre proposta busca "fortalecer os lazos comunitarios e ofrecer alternativas de lecer en familia", ao tempo que se rende homenaxe a Alba Rego Rodríguez no concurso de puzzles.