Sante acolle a ruta de sendeirismo “Voltiña a Sante” e unha gran paellada popular
A parroquia de Sante, en Trabada, prepárase para recibir este domingo 31 de agosto unha nova edición da súa popular andaina “Voltiña a Sante” xunto á tradicional paellada popular. A iniciativa, organizada pola Asociación de Veciños San Julián de Sante e Trabada paso a paso coa colaboración do Concello, consolidouse como unha xornada de encontro e diversión que combina deporte, tradición e gastronomía.
Segundo os datos actuais, máis de 100 persoas xa se inscribiron na ruta de sendeirismo, mentres que máis de 150 se sumarán á gran paellada, superando así as cifras da edición anterior. O alcalde, Rubén García, resaltou que “a crecente participación reflicte a boa acollida da actividade tanto entre a veciñanza de Trabada como entre persoas doutros concellos, consolidando este evento como un referente de convivencia e dinamización local”.
Dende a organización animan a toda a cidadanía e visitantes a participar nesta xornada festiva, que permitirá gozar do contorno natural da parroquia, practicar sendeirismo e compartir unha comida popular nun ambiente de boa compañía e alegría.