Santa Eulalia alerta de que a falta de presión deixa sen servizo a unha veciña e ao cemiterio parroquial
A Asociación de Veciños Santa Eulalia deu a coñecer que unha residente da zona alta de A Devesa leva anos soportando dificultades co abastecemento municipal de auga. O problema, segundo sinalan, agrávase no verán, cando se producen cortes frecuentes que afectan sobre todo a quen dependen unicamente da rede municipal, así como ao cemiterio parroquial.
“Esta muller non ten outra opción que a traída municipal, mentres que outros veciños contan con fontes particulares que usan durante todo o ano xa que nesta parroquia temos moita sorte de provernos delas”, explicaron desde a asociación, "de feito, se todos estes veciños tiveran que usar a auga da traída municipal o problema incrementaríase con creces". O caso provoca que, en ocasións, a auga nin sequera teña presión suficiente para acender o quentador, e os cortes chegan a horas moi diversas: tanto ás nove da mañá, como ás seis da tarde ou mesmo ás once da noite.
O colectivo veciñal púxose en contacto tanto co Concello de Ribadeo como coa empresa subministradora, Viaqua. Desde o Concello indican que o problema está na falta de presión, pero advirten de que non se pode aumentar porque existe risco de romper unhas tubaxes xa obsoletas. Así, aseguran que están á espera dunha axuda da Xunta de Galicia para renovar a rede en varias parroquias.
Pola súa parte, Viaqua non atopou unha solución definitiva e recomendou á afectada instalar un depósito propio para acumular auga.
No cemiterio parroquial a situación é semellante, o que leva a que moitas persoas opten por levar garrafas cando acoden a regar as plantas dos panteóns.
Desde a Asociación de Veciños Santa Eulalia piden unha solución inmediata para a veciña afectada, lembrando que “non se pode vivir sen un servizo tan básico como é a auga corrente”.