San Cibrao prepara unha Cabalgata de Reis 2026 con protagonismo para os máis pequenos
San Cibrao xa ten en marcha os preparativos para a Cabalgata de Reis Magos 2026, unha das citas máis esperadas do Nadal na vila. O Concello anunciou a apertura do prazo de inscrición para que nenas e nenos de entre 3 e 12 anos poidan participar no desfile como Paxes Reais, unha experiencia que cada ano esperta grande ilusión entre as familias.
As inscricións deberán formalizarse na Casa da Cultura antes do 30 de decembro. Desde o consistorio sinalan que esta é “unha oportunidade única para que a cativada viva de preto a maxia da noite máis especial do inverno”, acompañando ás súas Maxestades de Oriente na súa chegada a San Cibrao o próximo 5 de xaneiro.
A organización da Cabalgata conta coa colaboración da Asociación Mulleres de San Ciprián e da ANPA Península da Paz, que se encargarán de apoiar a loxística e dar continuidade a unha celebración que cada ano reúne a centos de veciños e visitantes.
O Concello anima ás familias a non deixar pasar esta ocasión, lembrando que o número de prazas é limitado e que a presenza dos Paxes Reais contribúe a dar cor, emoción e participación infantil a un desfile que xa é un sinal de identidade das festas de Nadal na localidade.