San Cibrao honra a súa mestra, Sagrario Martínez, cun retrato no Museo do Mar
O Museo do Mar de San Cibrao incorporou á súa colección un retrato de Sagrario Martínez López, mestra da antiga escola que deu orixe ao museo. A obra, un debuxo en carbón e xiz branca realizado polo artista mariñao Juanel Ponte Forest, baséase en fotografías recentemente localizadas polas súas antigas alumnas. A súa entrega foi recibida polo vicepresidente da Deputación, Efrén Castro, e pola xerente da Rede Museística Provincial, Encarna Lago.
O retrato será colocado na sala de entrada do museo, onde xa se exhiben un pupitre e fotografías históricas que lembran a función educativa do edificio, construído en 1931 grazas ao mecenado de Manuel Goñi Maíste e José María Montenegro, emigrantes na Arxentina. Con esta doazón, visibilízase a figura da mestra, outorgándolle o mesmo espazo de representación que ao mestre da sección masculina, Francisco Rivera Casás.
A iniciativa enmárcase no traballo da Rede Museística Provincial para recoñecer o papel das mulleres na historia e converter os museos en espazos máis inclusivos e representativos.
Exposición e encontro de saberes: "Cousas Nosas"
Durante a tarde, inaugurouse no museo a exposición fotográfica Palabra e memoria, impulsada polo IES Perdouro de Burela dentro do proxecto Modelo Burela. A mostra, con imaxes de Pepa Losada, María Mon e Aida López, documenta o escaso uso do galego na epigrafía funeraria e busca promover a súa recuperación. No acto, celebrado co profesor Bernardo Penabade, destacouse a importancia da lingua na memoria colectiva.