San Cibrao énchese de deporte e compromiso coa V Carreira Popular Maruxaina
San Cibrao volve vestir as súas mellores galas para recibir unha das citas deportivas máis esperadas do verán na Mariña: a V Carreira Popular Maruxaina, que se desenvolverá o venres 19 de xullo no complexo deportivo da Veiga. Trátase dun evento xa plenamente consolidado, tanto no calendario deportivo da comarca como na axenda lúdica da localidade, cunha proposta pensada para todas as idades.
A competición arrancará ás 11:00 horas coa participación dos máis pequenos. As distancias están adaptadas en función da idade, con 200 metros para a categoría Pitufo, 500 metros para os Benxamíns, 1.000 para os Alevíns e unha milla para Infantil e Cadete. A carreira absoluta, que consistirá nun percorrido de 5 quilómetros, comezará ás 12:00 horas.
As persoas interesadas poden formalizar a súa inscrición na web www.sportmaniacs.com, onde tamén se atopan os horarios, os percorridos e máis detalles do evento. A organización corre a cargo de Cervo Deporte, coa colaboración da Xunta de Galicia, a Deputación de Lugo e o programa Deporte Galego, entre outras entidades.
Desde o Concello de Cervo convidan á veciñanza e aos visitantes a sumarse a unha xornada que non só promove o deporte, senón que tamén reforza os valores comunitarios e familiares. “É unha actividade aberta, pensada para gozar en grupo e para poñer en valor a nosa contorna natural e mariñeira”, subliñan desde a organización.
Ademais do seu carácter deportivo e festivo, a carreira incorpora unha dimensión social e de concienciación, sumándose á loita contra a violencia de xénero. Así o reflicte o lema "NON á violencia de xénero", que estará presente na cartelería e comunicación do evento.