Rutas, tradicións e lecer: A Mariña prepárase para Plans con corazón

Do 5 de setembro ao 12 de outubro, 16 concellos ofrecerán rutas e visitas guiadas para coñecer patrimonio, natureza e tradicións locais

A Mariña Lucense prepárase un ano máis para acoller Plans con corazón, unha iniciativa que promove rutas e visitas guiadas polos 16 concellos do xeodestino, co obxectivo de dar a coñecer tanto á poboación local como aos visitantes a riqueza patrimonial, natural e cultural da comarca. As actividades desenvolveranse entre o 5 de setembro e o 12 de outubro, con percorridos que abranguen desde contornas urbanas ata espazos rurais, desde o litoral ata a Serra do Xistral.

A sexta edición desta proposta, promovida pola Mancomunidade de Concellos da Mariña en colaboración coa Xunta de Galicia e a Deputación de Lugo, conta coa participación de guías oficiais acreditados co selo de calidade turística SICTED, como Noela Feal, Carmen Delia, Ana Pena e Boris Vilar; así como especialistas en xeoloxía e ornitoloxía, Iván Rodríguez e Carlos Gil. Todos colaboran coa empresa Volta Montana para configurar unha programación que combina educación, lecer e experiencias únicas.

Cada actividade ten un número limitado de prazas e un custo que varía entre 5€ para inscrición individual, 9€ en parella e 15€ para grupos de ata cinco persoas. Este prezo inclúe a visita guiada e os seguros de Responsabilidade Civil e accidentes. As reservas poden formalizarse a través do enlace.

O programa abarca unha gran diversidade de experiencias. Entre as primeiras saídas destacan a ruta en Galdo, con Noela Feal, que permitirá coñecer a historia do antigo Concello e visitar a Panadería de Forno de Leña; ou a ruta ao Cadramón, con Boris Vilar, onde se explorará a montaña e a relación do ser humano coa natureza. Tamén inclúe itinerarios urbanos como a ruta da auga en Mondoñedo, ou actividades centradas na gastronomía, como a Faba de Lourenzá en Lourenzá e a cerámica de Sargadelos en Cervo.

Outras propostas inclúen rutas de observación ornitolóxica en Foz, percorridos polos montes de Xove, visitas culturais en O Vicedo e experiencias mariñeiras en Burela, co obxectivo de ofrecer unha visión completa da comarca e conectar coa esencia da Mariña Lucense.

Segundo os organizadores, “Plans con corazón contribúe á desestacionalización do turismo e permite descubrir os recursos máis singulares do territorio, combinando coñecemento, lecer e tradicións locais”, explican desde a Mancomunidade.

Plans con corazón – 16 rutas guiadas

1. Galdo (Viveiro): Venres, 5 de setembro – Historia do antigo concello e Panadería de Forno de Leña

2. O Cadramón (O Valadouro): Sábado, 6 de setembro – Relación do ser humano co territorio

3. Mondoñedo: Domingo, 7 de setembro – Ruta da auga e visita a explotación de porco celta

4. Alfoz: Venres, 12 de setembro – Ruta á beira do río Ouro e cerimonia do caldeiro máxico

5. Xove: Sábado, 13 de setembro – Penas Agudas, paisaxe e natureza insólitas

6. A Pontenova: Domingo, 14 de setembro – Ruta da Seimeira

7. Cervo: Luns, 15 de setembro – Historia da fábrica de siderurxia e louza, marmeladas

8. Trabada: Venres, 19 de setembro – Paisaxes de montaña, etnografía e patrimonio

9. Ribadeo: Sábado, 20 de setembro – Xeoruta dos Ollos, xeoloxía da paisaxe

10. Foz: Domingo, 21 de setembro – Avistamento de aves mariñas en barco

11. Lourenzá: Venres, 26 de setembro – Paseo fluvial, historia e gastronomía local

12. Ourol: Domingo, 28 de setembro – Montes de Ourol, flora, fauna e prehistoria

13. Riotorto: Sábado, 4 de outubro – Historia, sabores e patrimonio local

14. Barreiros: Domingo, 5 de outubro – Patrimonio e lendas das augas santas

15. O Vicedo: Sábado, 11 de outubro – Cabanas convertidas en teatros

16. Burela: Domingo, 12 de outubro – Historia da pesca e cultura mariñeira