Ribadeo transformará As Carrallas nun miradoiro sobre a ría
O Concello de Ribadeo anunciou a creación dun novo miradoiro nas Carrallas, continuando así coa súa estratexia de recuperación e posta en valor dos espazos naturais do municipio. O alcalde, Dani Vega, explicou que a actuación responde a unha dobre finalidade: conservar un entorno que estaba abandonado e evitar que se consolidase como aparcadoiro ilegal de vehículos e caravanas.
“Queremos que As Carrallas sexan un miradoiro para contemplar a fermosa ría de Ribadeo”, afirmou o rexedor, quen destacou que a intervención se enmarca no proxecto municipal de crear unha auténtica ruta de miradoiros. “Pouco a pouco imos conseguilo, como xa aconteceu no espazo do miradoiro de Loctudy, que estaba cheo de maleza e hoxe é un punto de encontro para veciños e visitantes”.
Vega subliñou que a mellora dos espazos naturais require tamén esforzos constantes de conservación. “Non podemos permitir que zonas con tanto potencial acaben convertidas en terreos sen valor engadido nin en aparcadoiros ilegais. Por iso puxémonos en contacto con Costas, que atendeu a nosa proposta, e agradecemos a súa colaboración e a do Goberno do Estado”, engadiu.
Segundo o alcalde, a creación do miradoiro das Carrallas é un paso máis nun plan que pretende coidar e mimar o patrimonio natural, transformando lugares abandonados en áreas de gozo paisaxístico. “A nosa intención é clara: protexer o medio, recuperar espazos degradados e ofrecer á cidadanía e ao turismo un valor engadido que consolide a Ribadeo como referente de sustentabilidade e calidade de vida”, concluíu.