Ribadeo rende homenaxe ao filántropo Ramón González no centenario do seu falecemento
Ribadeo conmemora estes días o centenario do pasamento de Ramón González, unha das figuras máis destacadas da súa historia recente polo seu firme compromiso coa cultura, o patrimonio e o benestar social. Cando se cumpren cen anos do seu falecemento, a vila pon en valor a memoria dun filántropo que, tras emigrar á Arxentina, mantivo sempre un vínculo estreito coa súa terra natal.
A presenza de Ramón González segue moi viva en espazos emblemáticos da localidade, como a Praza de Abastos ou o Cine Teatro, infraestruturas que puideron facerse realidade grazas ás importantes achegas económicas realizadas polo propio González. Estas iniciativas contribuíron decisivamente ao desenvolvemento urbano e cultural de Ribadeo, deixando unha herdanza que aínda hoxe forma parte do día a día da veciñanza.
O seu compromiso non se limitou a Ribadeo. O Porriño, localidade de orixe da súa esposa, Corona González, tamén se beneficiou dunha implicación constante no impulso de proxectos sociais e culturais. Esta ligazón entre ambas vilas reforzouse o pasado mes de xuño coa súa irmandade oficial, un xesto simbólico que recoñece unha historia compartida marcada pola figura do filántropo.
Precisamente, Ramón González foi o protagonista da décima edición do Ribadeo Indiano, celebrada este 2025, unha cita que serviu para afondar no seu papel como mecenas e na importancia da emigración galega no progreso das vilas de orixe.
Tanto Ramón como a súa dona destacaron sempre pola súa disposición a apoiar calquera iniciativa cultural que tivese lugar na súa contorna. A súa actitude solidaria e a súa implicación directa no avance das súas comunidades convertéronos en persoas moi queridas e lembradas.
Ramón González faleceu no Porriño o 15 de decembro de 1925. Días máis tarde, os seus restos mortais foron trasladados a Ribadeo, onde repousan, pechando simbolicamente unha vida marcada pola xenerosidade e polo compromiso coa súa terra.