Ribadeo recoñece ás mellores obras do II Certame de Fotografía Igualdade: Mulleres que Inspiran
O Concello de Ribadeo, a través do Centro de Información ás Mulleres (CIM), vén de anunciar o fallo do xurado do II Certame de Fotografía Igualdade Ribadeo: Mulleres que Inspiran, unha iniciativa que busca sensibilizar á cidadanía e fomentar o debate sobre a igualdade de xénero mediante a creatividade artística.
O xurado, formado por Elisa Vecino Álvarez e Cris Andina Barcia, profesionais do ámbito artístico, xunto con Patricia Pérez López, psicóloga do CIM, reuniuse o pasado 27 de febreiro para valorar as 17 obras presentadas, seguindo criterios como calidade técnica, creatividade, forza da mensaxe e adecuación á temática do certame.
Tras a deliberación, foron recoñecidas as seguintes obras: na categoría A (menores de idade), “A igualdade tamén se adestra”, de Ainara Vega Monteserín; na categoría B (maiores de idade), “Matriarca”, de Carolina Bouso Díaz; e na categoría C (centros de ensino), “A miña guerreira”, de Pablo Martínez Janeiro, do Colexio Sagrado Corazón de Jesús.
Dende a organización destacan a elevada participación e agradecen a implicación de todos os autores e entidades que fixeron posible esta segunda edición. Nos próximos días darase a coñecer o espazo no que se expondrán as 17 fotografías, permitindo á veciñanza disfrutar das obras e reforzando o papel da arte como ferramenta de transformación social e promoción da igualdade.