Ribadeo recibe a Bandeira Verde de Galicia polo seu compromiso co medio ambiente
O Concello de Ribadeo foi distinguido coa Bandeira Verde de Galicia, un recoñecemento que outorga a Xunta aos municipios máis comprometidos coa sostibilidade e a conservación do medio ambiente.
O concelleiro de Medio Ambiente, Diego Dos Santos, desprazouse ata o municipio de Mos para participar no acto oficial de entrega, que estivo presidido polo presidente da Xunta de Galicia, Alfonso Rueda, e pola conselleira de Medio Ambiente, Ánxeles Vázquez.
Durante o evento, Dos Santos subliñou que “este galardón é un recoñecemento ao traballo realizado nos últimos anos por parte do Concello, das entidades colaboradoras e tamén da veciñanza, que demostra día a día o seu compromiso co coidado do entorno”. Engadiu ademais que a Bandeira Verde “é un aliciente para continuar avanzando cara a un modelo de desenvolvemento local máis sostible, baseado no respecto á natureza e na mellora da calidade de vida”.
Con esta distinción, Ribadeo consolídase como un referente ambiental en Galicia, grazas a políticas activas en materia de reciclaxe, eficiencia enerxética, xestión de residuos e conservación do patrimonio natural. O Concello reafirma así a súa aposta por un futuro máis verde, equilibrado e responsable co planeta.