Ribadeo presenta unha ampla programación de Nadal con música, teatro, pista de xeo e propostas para todas as idades
Ribadeo xa ten listo o seu programa oficial para o Nadal 2025, unha proposta extensa e variada que encherá as rúas da vila de música, cultura, tradición e actividade familiar durante máis dun mes. A programación, impulsada polo Concello e por ACISA, comezará o 28 de novembro co acendido do alumeado e a inauguración do Mercado de Nadal, dous momentos que cada ano congregan a numerosos veciños e visitantes. Ese mesmo día, Ribadeo Cantáo Nadal no Campo de San Francisco, marcando o primeiro encontro musical destas festas.
As actividades continuarán o 29 de novembro cun magosto organizado polos Amigos da Gaita e, xa o día 30, co espectáculo O cantar delas. Son de corda no Cine Teatro. A primeira fin de semana de decembro traerá propostas gastronómicas, como o Menú de Nadal o día 3, e outras xa tradicionais, como a apertura oficial da Pista de Xeo e Ribakoga o 5 de decembro pola tarde, seguida dunha Noite de Gospel do grupo Aba Taano no auditorio.
O mes ofrecerá tamén degustacións doces, como a xornada dedicada aos Postres de Nadal o 6 de decembro, ou a demostración culinaria de Adornos de Nadal para público familiar, a cargo de Lucía Barro no mesmo día. O Mercado de Nadal clausurarase o 8 de decembro, coincidindo coa ponte festiva.
A axenda cultural continuará con eventos como o Festival de Nadal da EMMd o día 13; o teatro infantil Toliliates. Trécola Teatro o 14; e o concerto do Coro Sagrado Corazón no Centro de Día o 15. Ademais, o 19 haberá dobre celebración na Residencia e no Centro de Día co Argaedo de Nadal. Para o día 20 está prevista a actuación das Mestas de Conto na Biblioteca Municipal e, á tarde, o espectáculo Maxica-mente impulsado pola asociación Saúde Mental da Mariña.
O 21 de decembro Ribadeo recibirá unha das citas máis populares das datas: a Papanoleada polas rúas da vila, con visita a Rinlo. Esa mesma xornada terá lugar un concerto da Coral Polifónica de Ribadeo xunto ao Coro Sagrado Corazón na igrexa parroquial. Xa o día 24, a vila preparará a chegada da noiteboa co tradicional Desfile de Papá Noel.
O 27 de decembro a música regresará ao auditorio municipal co espectáculo Aquí como en Viena. BMMR, e ao rematar celebrarase unha festa de pre-fin de ano organizada pola asociación Catro Caños. A Coral Polifónica volverá actuar o día 28 polas rúas, mentres que o 29 e o 30 haberá sesións de cine de Nadal e actividades familiares no Parque de San Francisco. A última edición da marcha Interxeneracional San Silvestre terá lugar o 30 ás 12:00 horas.
O fin de ano completará unha programación que inclúe a tradicional Carreira San Silvestre o día 31 e, xa en xaneiro, dous días dedicados aos cantos de Reis, tanto infantil (2 de xaneiro) como adultos (3 de xaneiro). Ese mesmo día celebrarase un concerto con María do Ceo e a Coral Polifónica de Ribadeo.
A recta final das festas virá marcada pola chegada das Súas Maxestades: o 4 de xaneiro representarase o musical Aladdin e o 5 celebrarase a Cabalgata de Reis, mentres que o día 10 pechará a programación o Musical Mago de Oz e a festa do comercio nas carpas da rúa Rosalía de Castro.
O Concello destaca que se trata “dun Nadal pensado para todos os públicos, con actividades que combinan tradición e novidades, e que buscan dinamizar Ribadeo durante unhas datas tan especiais”.