Ribadeo presenta o seu Observatorio Cidadán da Biodiversidade para promover a fotografía e conservación da natureza
O vindeiro luns 24 de marzo, ás 19:30 horas, celebrarase no Salón dos Alcaldes a presentación do Observatorio Cidadán da Biodiversidade de Ribadeo, un proxecto que nace co obxectivo de fomentar a fotografía e o rexistro da biodiversidade local, ao tempo que contribúe ao seu estudo e conservación. Esta iniciativa busca implicar á cidadanía no coñecemento e protección do entorno natural, animando á xente a capturar imaxes e datos sobre a fauna e flora da zona.
O acto contará coa intervención de persoas expertas como Antonio Ordóñez, presidente da Asociación Fotografía e Biodiversidade, e Belén Pérez, representante local do Observatorio Cidadán da Biodiversidade. Ambos compartirán os seus coñecementos sobre a importancia da fotografía como ferramenta de sensibilización ambiental e a relevancia do proxecto para a conservación dos ecosistemas locais.
Se es amante da natureza e che interesa saber máis sobre esta iniciativa, non perdas esta oportunidade de participar e descubrir como podes involucrarte no proxecto para preservar a biodiversidade de Ribadeo.