Ribadeo presenta a súa Semana Santa cunha programación espiritual e participativa
O Salón dos Alcaldes do Concello de Ribadeo foi o escenario da presentación oficial da Semana Santa 2025, que se celebrará entre os días 11 e 20 de abril. O evento contou coa participación de representantes municipais, eclesiásticos e da Confraría da Semana Santa, quen puxeron en valor a fonda tradición relixiosa e cultural desta festividade.
O alcalde, Dani Vega, subliñou o carácter espiritual e arraigado desta celebración, destacando que "a Semana Santa de Ribadeo é moi nosa, unha manifestación de fe e tradición". Ademais, expresou o seu agradecemento ao labor da parroquia e lembrou a figura de Salvador Fernández, recoñecendo a súa dedicación. Vega tamén salientou que esta é a primeira ocasión na que a Semana Santa se presenta oficialmente no Concello.
Pola súa banda, o párroco de Ribadeo, Gonzalo Varela, fixo referencia á influencia franciscana nestas datas, lembrando que "Ribadeo é unha vila esencialmente franciscana". A programación inclúe o pregón, que será pronunciado o 12 de abril polo profesor xubilado Roberto Rodríguez, así como o Vía Crucis do Luns Santo, que contará coa presenza do Bispo de Mondoñedo-Ferrol, Fernando García Cadiñanos.
O cartel oficial da Semana Santa 2025 foi elaborado polo recoñecido pintor ribadense Juan Monteavaro. Durante a presentación, Salvador Fernández, en representación da Confraría, quixo agradecer o traballo de todos os colectivos e voluntarios que fan posible a celebración, resaltando as colaboracións coas que contan. Ademais, anunciou que a Misa de Dores estará dedicada aos confrades falecidos. Fernández tamén fixo un chamamento á participación cidadá, animando a sumarse á celebración e sinalando que "precisamos levadores para as procesións e tamén xente que toque os tambores".
A Semana Santa de Ribadeo, con raíces profundas e unha intensa vivencia comunitaria, preséntase unha vez máis como un momento de reflexión e participación, convidando tanto a veciños como visitantes a vivir estas datas con devoción.