Ribadeo incrementa as axudas en Benestar Social ata os 14.500 euros
![sinatura-convenios-Benestar-Social-ribadeo](https://amarinaxa.com/wp-content/uploads/2024/08/sinatura-convenios-Benestar-Social-ribadeo.jpg)
Ribadeo incrementa as axudas en Benestar Social tras asinar os convenios das subvencións nominativas para 2024. As asociacións beneficiarias son Cogami, Axuda ao Enfermo Mental A Mariña, Fundación Edes, Cruz Vermella e Cáritas. A partida destinada a este fin é de 14.500 euros.
“Creo que demos un paso moi importante. En primeiro lugar, colaborar con máis entidades e subir a partida, dentro dos orzamentos 2024, dentro dun Plan Estratéxico 24-26, que foi aprobado no pleno do 4 do 12 do 2023. Houbo un total respaldo por parte do pleno, polo tanto respáldanos e tamén garante un total apoio por parte dos grupos políticos”, explicou o alcalde, Dani Vega.
O rexedor cre que “o Concello acertou en incrementar as partidas orzamentarias en Benestar Social e tamén acertamos en sumar mais entidades á hora de colaborar. Entre todos estamos facendo un bo traballo”.
Deste xeito, colaboran coa asociación Cogami, cunha achega de 2.000 euros, tamén coa asociación Axuda ao Enfermo Mental A Mariña con 4.000 euros, coa Fundación Edes con 2.000 euros, coa Cruz Vermella. “É a primeira vez que se incorpora a este Plan Estratéxico, e tamén colaboramos con Cáritas, con toda ese labor que está facendo, creo que tamén é importante. Todos estes colectivos que cumpren unha función importante, que cumpren cun traballo que ás veces non valoramos, e desde logo desde as institucións, debemos valorar e apoiar con orzamentos”.
Para o alcalde ribadense “o de hoxe foi un acto importante, debemos seguir incrementando entidades no 2025 e así o vamos facer. Seguiremos colaborando e quero darlles as grazas a todos por ese inmenso traballo que realizan todos os días”.