Ribadeo impulsa novas visitas teatralizadas ao Forte de San Damián para divulgar a súa historia costeira
O Concello de Ribadeo, a través do proxecto Ribadeo Cara ao Mar, vén de anunciar unha nova edición das visitas teatralizadas ao Forte de San Damián, unha proposta divulgativa que combina patrimonio, historia e interpretación escénica para achegar dun xeito dinámico a evolución defensiva e marítima da vila.
A actividade, que se desenvolverá os días sábado 22 e domingo 23 de novembro, contará con guías-actores que recrearán personaxes e episodios vencellados ao forte e ao sistema de defensa costeira de Ribadeo. O público poderá descubrir tanto feitos documentados como lendas e anécdotas que forman parte da memoria deste enclave estratéxico, cun formato participativo e apto para todas as idades.
Os pases celebraranse no interior do propio recinto do Forte de San Damián, un dos elementos patrimoniais máis destacados do litoral ribadense. Haberá funcións en horario de mañá e tarde —11:30, 12:00, 13:30, 17:00 e 18:00 horas— para facilitar o acceso a todos os interesados.
A participación é totalmente gratuita, mais require inscrición previa a través da web municipal: fortesandamian.gal/visitas-teatralizadas-2/
Esta iniciativa enmárcase nas accións do programa Ribadeo Cara ao Mar, orientado á difusión, posta en valor e dinamización do patrimonio marítimo, social e histórico do municipio. O obxectivo é favorecer que a cidadanía e os visitantes comprendan a relevancia deste legado e o papel que xogou ao longo dos séculos na identidade ribadense.
O proxecto conta cunha axuda tramitada a través do GALP A Mariña-Ortegal e aprobada pola Consellería do Mar, no marco do programa FEMPA 2021-2027. A iniciativa está cofinanciada pola Unión Europea e pola Comunidade Autónoma de Galicia.