Ribadeo dálle cor á diversidade cun mural no ascensor panorámico
O Concello de Ribadeo vén de poñer en marcha a creación dun novo mural no ascensor panorámico do paseo marítimo, unha iniciativa que nace do Concurso de Arte Mural pola Diversidade. A obra, deseñada pola artista gañadora Andrea Lombardia, busca ser un símbolo visual da defensa da igualdade, a pluralidade e a inclusión no municipio.
A concelleira de Igualdade, Begoña Sanjurjo, explicou que “durante os próximos días Andrea Lombardia dará vida á súa proposta artística, unha composición que quere transmitir os valores da diversidade, a igualdade e a visibilidade do colectivo LGTBIQ+ en Ribadeo”.
A intervención artística ocupará unha superficie aproximada de 2,20 metros de alto por 3 de ancho e situarase nun punto estratéxico, visible para veciños e visitantes. “O mural será un espazo emblemático de expresión cultural e artística, que contribuirá a facer de Ribadeo unha vila máis aberta e inclusiva”, destacou Sanjurjo.
A execución deste proxecto, promovido pola Área de Igualdade do Concello, quere consolidar o paseo marítimo como un lugar de encontro onde a arte se converte nunha ferramenta de sensibilización e respecto á diversidade.