Ribadeo celebra a romaxe das Cruces, de interese turístico galego, con pregón, música e o bandeo do pendón
Esta fin de semana, sábado e domingo, celebrarase na Ponte de Arante a romaxe das Cruces, festa de interese turístico galego. Haberá pregón, actuacións musicais, xantar e o tradicional bandeo do pendón e a reverencia das cruces, entre outras actividades. O alcalde de Ribadeo, Dani Vega, destacou na presentación que “toda esta organización, a recreación da batalla ou xa a cuarta comida que se vén celebrando aquí, que é ese punto de encontro que fai máis grande este lugar, que se xunten todos os peregrinos en torno a un prato para degustalo e desfrutalo entre todos”.
O domingo, que é o día grande, “queremos todos recordar ese encontro das sete parroquias e o bandeo do pendón, que iso é o que nos diferenza. Realmente a festa de interese turístico autonómico é polo bandeo, é polo punto de encontro das sete cruces das sete parroquias e é por recordar esa batalla contra as tropas francesas. E polo tanto nós, como gañadores, debemos destacalo”.
O rexedor quixo felicitar á organización, a Roberto Rodríguez, aos veciños e veciñas non soamente da parroquia da Arante senón do entorno que colaboran tamén economicamente e debemos darlles as grazas de corazón. “E ás institucións: o Concello fai o que ten que facer, que é colaborar, e a Xunta de Galicia axuda economicamente para que esta festa siga celebrándose”.
Pregón da man de Roberto Rodríguez
O pregoeiro da festa será Roberto Rodríguez. “Como teñen a intención de que haxa un pregoeiro ou pregoeira cada ano, pedíronmo e ao principio pídeche o corpo dicir que non, pero é imposible porque veñen en nome da Virxe das Virtudes e a ver quen é o que se atreve. Estou moi orgulloso, por suposto, porque é unha festa moi representativa do noso e todos ao longo da nosa vida pasamos por As Cruces máis dunha vez”.
En representación da comisión organizadora falou Suso García. “Os actos da festa das Cruces vanse celebrar os días 18 e 19 de maio. O sábado 18 empezaremos ás doce da mañá na igrexa co pregón a cargo de Roberto Rodríguez e a continuación o concerto de Manoele de Felisa”. E o domingo 19, farase a bendición dos campos ás 12.30 horas, teremos a procesión, o bandeo do pendón e a reverencia das cruces, todo isto amenizado polo Grupo de Gaitas de Tovar.