Ribadeo avanza como concello inclusivo con iniciativas pioneiras en accesibilidade e integración
Ribadeo consolídase como un referente en políticas inclusivas coa posta en marcha de dous proxectos pioneiros que sitúan ás persoas no centro da acción municipal. O Concello participou esta semana en Madrid nun encontro da Federación Española de Municipios e Provincias (FEMP), onde deu a coñecer iniciativas que combinan integración social, accesibilidade e igualdade de oportunidades.
Por unha banda, o goberno local anunciou a contratación dunha persoa con discapacidade intelectual, que desempeñará o seu labor directamente adscrita á Alcaldía. Trátase dunha experiencia inédita na provincia, coa que Ribadeo aposta por un modelo de integración real dentro da administración local. A persoa contratada pertence á asociación Down Lugo, un colectivo co que o Concello mantén unha colaboración activa.
O alcalde, Dani Vega, destacou que esta medida supón “un paso cualitativo para demostrar que a inclusión non é un discurso, senón unha práctica diaria”, subliñando que Ribadeo será o único concello da provincia en incorporar unha persoa con discapacidade intelectual nun posto vinculado directamente á Alcaldía.
A segunda iniciativa presentada é un proxecto piloto de baño asistido nunha das praias do municipio, aínda pendente de definir. O obxectivo é facilitar que persoas con mobilidade reducida poidan acceder á auga con apoio profesional e con total seguridade. O servizo contará con persoal especializado da asociación Cogami, así como con equipamento adaptado.
Este programa converterá Ribadeo no primeiro concello de Galicia en ofrecer un sistema integral de apoio ao baño con persoal cualificado, grazas ao financiamento íntegro da Xunta de Galicia. Para o alcalde, trátase dun avance “moi significativo” que reforza o compromiso municipal coa mobilidade accesible e coa igualdade real.
Vega remarcou o orgullo que supón presentar estes proxectos en Madrid, afirmando que Ribadeo “demostra que pode liderar políticas públicas que colocan ás persoas no centro das decisións”.