Ribadeo aposta pola recuperación da marxe galega da ría con 800.000 euros de fondos europeos
Ribadeo vén de dar un novo paso na súa estratexia medioambiental coa captación de máis de 800.000 euros a través do programa europeo Life Fluvial, que permitirá mellorar a marxe galega da ría. O proxecto inclúe a eliminación de eucaliptos e outras especies invasoras, así como a repoboación con árbores e plantas propias do ecosistema.
O alcalde, Dani Vega, sinalou que “seguimos investindo e mellorando todos os espazos verdes. Somos o concello que máis fondos europeos xestionou e neste caso destinamos máis de 800.000 euros para recuperar toda a zona da ría, nos terreos da marxe galega”. O rexedor destacou que se actuará especialmente na enseada da Vilavella e na senda peonil que conecta As Aceas co Muíño de Mareas.
Vega lembrou que este proxecto vén consolidar un traballo iniciado hai anos e agradeceu as xestións previas que fixeron posible continuar captando recursos comunitarios. “Un espazo degradado, que antes era un eucaliptal pouco produtivo, converteuse nun pulmón verde para a práctica deportiva e o lecer. Agora queremos dar un paso máis, eliminando rebrotes de eucaliptos e incorporando nova planta autóctona”, asegurou.
O alcalde tamén fixo referencia á posibilidade de establecer vínculos coa beira asturiana da ría para crear un cinto verde transfronteirizo. “A nosa intención é conservar e ampliar esta vía verde, mellorándoa un quilómetro e medio máis e garantido que este patrimonio natural continúe a ser un referente”, apuntou.
Segundo indicou, “trátase dun investimento que engade valor a unha zona que estaba degradada e que hoxe é fundamental para Ribadeo. O obxectivo é claro: conservar, mellorar e ampliar este espazo natural para o goce da veciñanza e das futuras xeracións”.