Ribadeo afonda na intelixencia artificial con debate e reflexión sobre os seus riscos e oportunidades
O ciclo Soberanía Dixital, impulsado polo colectivo amarinha.gal, regresa a Ribadeo cunha nova proposta centrada nun dos temas máis candentes da actualidade: a intelixencia artificial (IA). A cita será o venres 6 de xuño ás 17:30 horas na Biblioteca Pública Municipal El Viejo Pancho, espazo cedido polo Concello para o desenvolvemento desta iniciativa ao longo de todo o ano 2025.
Baixo o título “Soberanía Dixital V: A IA. Posibilidades e perigos”, a sesión propón un diálogo aberto entre os enxeñeiros Mario Penelo e José Manuel Ventoso, dous profesionais cunha ampla traxectoria no ámbito dixital e unha visión crítica e informada sobre os usos, potencialidades e ameazas que supón esta tecnoloxía. A conversa estará moderada pola escritora Lucía Ferro, e ao remate abrirase un tempo de coloquio co público asistente.
Trátase dunha actividade deseñada para achegar a tecnoloxía á cidadanía de forma accesible, fomentando a reflexión sobre como a IA se está a integrar en múltiples aspectos da vida diaria, tanto no plano persoal como profesional ou institucional. O obxectivo, segundo explican desde amarinha.gal, é promover un uso consciente da tecnoloxía e unha defensa activa da soberanía dixital, concepto clave nun mundo cada vez máis interconectado e automatizado.
Como complemento ao evento, publicarase un fanzine en galego cun formato ampliado, no que se recollen artigos de membros da organización e achegas externas de diversos autores que exploran a IA desde múltiples perspectivas.
A entrada é libre ata completar aforo, e está dirixida a todas aquelas persoas que queiran entender mellor os cambios do presente e as ferramentas que definirán o futuro.