Ribadeo acollerá unha xuntanza internacional sobre hidróxeno aplicada aos vehículos
Do 14 ao 18 de agosto, Ribadeo será sede dunha importante reunión do proxecto europeo Theide, coordinado pola asociación Apaga. Este encontro reunirá a 15 profesores procedentes de varios países europeos, entre eles Turquía, Croacia, Italia e Portugal.
Álvaro Doural, presidente de Apaga, explicou que esta será a última xuntanza do proxecto, que remata o 30 de agosto. “Imos acoller na reunión a socios de Turquía, de Croacia, de Italia e de Portugal. Traballaremos sobre o proxecto, con xornadas técnicas pola mañá e actividades culturais pola tarde, como a subida en barca pola Ría de Abres, visitas a Taramundi, ao Museo do Mar de San Ciprián, a Sargadelos e á Praia das Catedrais en Ribadeo”.
O proxecto Theide céntrase na utilización do hidróxeno nos vehículos, e contempla tanto a parte técnica como a cultural. Doural destacou que “fixéronse unha serie de unidades didácticas para traballar nos centros de formación profesional. Ademais, cada socio instalou no seu centro unha hidroxenera coa que os alumnos traballarán nas próximas xeracións”.
Tamén está prevista unha ponencia da empresa española Ajusa, especializada na construción de hidroxeneras, unha firma clave no desenvolvemento desta tecnoloxía.
Todos os materiais elaborados durante o proxecto estarán dispoñibles de forma gratuíta na páxina web de Apaga, segundo indicou o seu presidente.
Dentro das actividades de Apaga, tamén se inclúen prácticas para alumnado procedente de diversos centros europeos. O domingo 13 de xullo chegará un grupo de nove estudantes portugueses de Lisboa que permanecerán un mes en Ribadeo, formándose en empresas locais como Gondán e outras firmas da zona. Doural lembrou que este curso xa pasaron pola zona 45 alumnos italianos, e que a acollida de alumnado en empresas de Ribadeo, Vegadeo, Barreiros e Foz é unha das funcións principais que desenvolve a asociación.
Fórum e Feira do Automóbil
Apaga está tamén a preparar a décimo cuarta edición do Fórum de Innovación e Formación sobre Vehículos, que terá lugar do 27 ao 29 de agosto, xunto coa segunda edición da Feira do Automóbil. “O Fórum contará cunha destacada participación das empresas habituais que colaboran con nós, e tamén incluirá a presenza importante de socios europeos e de Hispanoamérica”, indicou Doural, lembrando que estará presente un enxeñeiro da Universidade de Bogotá.
Con estas actividades, Apaga continúa a impulsar a innovación, a formación e a internacionalización no sector automóbil, facendo de Ribadeo un punto de referencia nesta área.