Ribadeo acollerá en abril a cuarta edición do seu concurso solidario de quebracabezas
O Pavillón Municipal de Deportes de Ribadeo será escenario o vindeiro 19 de abril de 2026 da cuarta edición do Concurso Solidario Puzzle Ribadeo, unha cita que combina lecer, competición e solidariedade. A iniciativa ten como finalidade recadar fondos para a Fundación Sergio Villar, á que se destinará integramente o diñeiro obtido co evento.
A xornada contará con diferentes categorías adaptadas ás idades dos participantes. A competición comezará pola mañá coa categoría infantil individual, programada entre as 10:00 e as 11:30 horas. Neste apartado participarán nenos e nenas divididos en tres grupos de idade: de 4 a 6 anos, que deberán completar un quebracabezas de 100 pezas; de 7 a 9 anos, con quebracabezas de 200 pezas; e de 10 a 12 anos, que afrontarán un desafío de 300 pezas.
Posteriormente celebrarase a categoría de parellas, na que dous participantes deberán resolver conxuntamente un quebracabezas de 500 pezas nun tempo comprendido entre as 12:00 e as 14:00 horas.
A organización entregará premios e trofeos aos tres mellores resultados de cada categoría, así como un recoñecemento especial á mellor parella local.
As inscricións poderán formalizarse a través da páxina web www.aepuzz.esentre o 19 de marzo e o 15 de abril, cun número de prazas limitado. O prezo de participación será de 10 euros por participante na categoría infantil e de 22 euros por parella na categoría de adultos, cun desconto para as persoas asociadas á entidade organizadora.
O concurso está promovido por Aepuzz, a Asociación Española de Puzzles, coa colaboración de diferentes entidades e empresas. Ademais do seu carácter competitivo, o evento pretende fomentar a convivencia, o entretemento en familia e a participación nunha causa solidaria.