Ribadeo acollerá a estrea da nova xira de Panorama no Camiño Norte Fest
Ribadeo converterase o vindeiro 2 de abril nun dos epicentros musicais da Mariña lucense coa celebración do Camiño Norte Fest, unha cita que servirá de escenario para a presentación da nova xira Time Tour 2026 da orquestra Panorama nesta zona e no Occidente asturiano.
O evento, organizado pola Comisión de Festas de Ribadeo, desenvolverase no aparcadoiro municipal, un espazo que estará acondicionado cunha gran carpa para garantir o desenvolvemento da actividade. O recinto contará ademais con servizo de bar e diferentes food trucks, completando así unha proposta pensada para ofrecer unha experiencia festiva integral.
A apertura das billeteiras está prevista para as 20:30 horas, mentres que o acceso ao recinto se realizará a partir das 22:30 horas. Ao longo da noite, o escenario tamén acollerá as actuacións dos DJs Alejandro Martínez e Litainer, que contribuirán a dinamizar o ambiente musical do festival.
As entradas poderán adquirirse o propio día do evento por un prezo de 15 euros, aínda que tamén se ofrece a posibilidade de compra anticipada por 12 euros a través da plataforma woutick.com e en distintos puntos de venda distribuídos por varias localidades da contorna, tanto en Galicia como en Asturias.
Desde a organización destacan que esta nova proposta pretende consolidarse como unha cita relevante no calendario festivo da Semana Santa. O representante da Comisión de Festas de Ribadeo, Juan López, subliñou que o festival nace coa intención de ofrecer “música, espectáculo e ambiente no corazón do Camiño Norte”, contando coa participación dunha das orquestras máis recoñecidas e cun cartel complementario de DJs.
López agradeceu tamén a colaboración do Concello de Ribadeo, da Xunta de Galicia, así como de patrocinadores e entidades colaboradoras que fan posible a celebración desta iniciativa, chamada a converterse nun referente de ocio na comarca.