Ribadeo acolle o 14º Foro de Innovación e Formación en vehículos
O director territorial da Consellería de Economía e Industria en Lugo, Gustavo Casasola, participou este martes en Ribadeo na inauguración do 14º Foro de Innovación e Formación sobre Vehículos, organizado pola Asociación de Profesores Técnicos e de Ensino Secundario de Automoción de Galicia (Apaga) coa colaboración da Xunta de Galicia.
Durante a súa intervención, o representante autonómico felicitou á entidade por promover un ano máis un encontro no que se analizan “os principais retos e desafíos do sector”, entre os que subliñou “a internacionalización e a preparación de profesionais capaces de responder ás esixencias dunha industria en constante evolución”.
Casasola explicou que a Xunta “amplía cada curso a oferta de ciclos formativos relacionados coa automoción e coa electromecánica, reforzando os vínculos entre centros educativos e empresas”, ademais de fomentar a mobilidade internacional do alumnado galego. Tamén fixo referencia ás políticas de apoio á mobilidade sostible, como o Plan Renova, que incentiva a compra de vehículos eficientes, e o Plan Moves, destinado á adquisición de automóbiles eléctricos.
O foro prolongarase ata o venres e contará con relatores procedentes de distintos puntos de España e doutros países como Colombia, Italia e Portugal. As sesións están dirixidas a docentes, alumnado universitario e de Formación Profesional, profesionais do sector da automoción e tamén a persoas afeccionadas ao mundo do motor.