Ribadeo abre o prazo de inscrición nas súas escolas deportivas de verán
O Concello de Ribadeo ten aberto ata o vindeiro 20 de maio o prazo para matricularse nas escolas deportivas de verán, que ofrecerán un amplo abano de disciplinas ao aire libre: pesca deportiva, piragüismo, skate, surf e vela.
O edil de Deportes, Francisco José Silvent, explicou que estas actividades están dirixidas a rapazas e rapaces nados entre os anos 2010 e 2017. Ademais, indicou que o sorteo para asignar as prazas dispoñibles terá lugar o 21 de maio.
Entre as propostas destaca a escola de pesca deportiva, que contará con 20 prazas e se desenvolverá ao longo do mes de xullo. Tamén en xullo terá lugar a escola de surf, cun total de 18 prazas e dúas sesións especiais centradas en actividades náuticas.
A disciplina de skate manterase activa tanto en xullo como en agosto, cunha dispoñibilidade de 18 prazas. No caso do piragüismo, a oferta ascende a 35 prazas destinadas especificamente a menores nados no ano 2016. A actividade organizarase en dous grupos e os horarios estarán condicionados polas mareas.
A escola máis temperá será a de vela, que dará comezo xa no mes de xuño. Haberá dúas quendas con 8 participantes en cada unha, sumando un total de 16 prazas dispoñibles.
O custo de participación en cada modalidade deportiva será de 40 euros. O pagamento deberá realizarse entre o 27 de maio e o 3 de xuño mediante ingreso na conta bancaria do Concello en Caixa Rural. Posteriormente, será necesario entregar o xustificante de pago na Casa da Xuventude.