Ría de Abres acolle a presentación da nova fase de TestEo dentro da estratexia Eo Alimenta
O Centro Sociocultural de Ría de Abres, no concello de Trabada, será o escenario este venres 27 de marzo dunha xornada pública promovida pola Estratexia Eo Alimenta, coa que se pretende dar a coñecer os avances do proxecto TestEo e impulsar a súa nova etapa. O encontro está aberto á cidadanía, entidades e persoas vinculadas á agroecoloxía e ao desenvolvemento rural.
A iniciativa ten como obxectivo principal compartir o traballo realizado ata o momento e reforzar o compromiso colectivo cara a un sistema alimentario máis sostible, xusto e conectado co territorio. Eo Alimenta configúrase como unha estratexia participativa orientada á transformación do modelo alimentario na biorrexión do Eo, apostando pola produción agroecolóxica, os circuítos curtos de comercialización e a incorporación de novas xeracións ao sector agrario.
No marco desta estratexia estanse a desenvolver dous proxectos clave. Por unha banda, ComerEo, centrado na promoción do consumo de produtos locais e ecolóxicos, especialmente en comedores escolares; e, por outra, TestEo, unha iniciativa destinada a facilitar a entrada de novas produtoras e produtores no ámbito agroecolóxico mediante o acompañamento en fincas mentoras do territorio.
Tras unha primeira fase centrada no deseño, financiamento e desenvolvemento metodolóxico, TestEo inicia agora a súa segunda etapa, na que participarán seis persoas en seis explotacións agrarias, consolidando así o espazo de aprendizaxe e experimentación na biorrexión.
A xornada combinará intervencións institucionais e técnicas con actividades simbólicas sobre o terreo. O programa comezará cun acto de benvida a cargo de representantes de entidades e institucións implicadas, seguido da plantación simbólica dunha árbore, como sinal de arraigamento e cooperación. Posteriormente, presentarase o estado actual do proxecto e as liñas de acción previstas para os vindeiros meses, antes de dar paso á atención aos medios e ao peche do encontro.
Desde a organización destacan que esta cita servirá para fortalecer as redes de colaboración entre administracións, colectivos e veciñanza, ao tempo que visibiliza o avance cara a un modelo alimentario máis vinculado ao territorio e favorece a implantación de novas iniciativas agroecolóxicas na comarca.