Renfe rexistra este verán máis de 105.000 novos viaxeiros nos trens de alta velocidade de longa distancia
Renfe rexistrou máis de 105.000 novos clientes nos servizos de Alta Velocidade e Longa Distancia con orixe e destino en Galicia nos meses de verán, desde o 1 de xullo ata o 15 de setembro, alcanzando un crecemento do 33% de viaxeiros con respecto ao mesmo período do ano 2023. Así o anunciou o Ministerio de Transportes.
Durante este verán, Renfe transportou a máis de 420.000 viaxeiros na nova oferta de trens que circulan polo corredor Galicia-Madrid. Á oferta de servizos comerciais AVE e Alvia que Renfe xa operaba nas súas comunicacións con Galicia, incorporáronse desde o 21 de maio deste ano os novos servizos AVE que levan a alta velocidade ata novos destinos como Vigo, Pontevedra, Santiago de Compostela, A Coruña, Vilagarcía de Arousa e A Gudiña.
Aos novos destinos AVE, Renfe sumou desde o 22 de xullo a estrea do seu servizo Avlo, a marca de alta velocidade de baixo custo con circulacións que alternan as súas orixes/destinos entre Vigo-Madrid e A Coruña-Madrid.
Os novos servizos AVE e Avlo de Renfe préstanse cos trens S106 de rodadura desplazable, uns convois con maior capacidade que contan con 507 prazas a bordo na súa versión AVE e 581 en formato Avlo, o que facilitou ese crecemento do 33% do número de viaxeiros.