Portos adxudica a ampliación de atraques no peirao de Celeiro
A Consellería do Mar, a través de Portos de Galicia, vén de adxudicar as obras de ampliación das instalacións e nomeadamente os atraques do porto de Celeiro. A execución dos traballos suporá un investimento de 580.000 euros por parte do ente público e ten un prazo previsto de 6 meses.
As obras, que darán comezo nas vindeiras semanas, consisten na instalación de novas prazas de atraque mediante pantaláns flotantes e a recolocación dun dos pantaláns deportivos existentes, para cubrir as necesidades de toda a frota profesional (3ª lista) e de recreo (7ª lista) existente. Para a 3ª contémplanse 18 novas prazas de esloras entre 8 e 14 metros e para a náutica 52 prazas de 6 metros.
Así mesmo, os traballos contemplan o deseño dun novo pantalán para a frota profesional, situado na marxe sur da dársena, xunto aos peiraos de descarga de embarcacións da 3º lista. Os atraques para embarcacións de recreo estarán situados na marxe este da dársena e os dous pantaláns de embarcacións deportivas contan con accesos independentes. Para dar cabida á frota profesional será preciso recolocar un destes pantaláns deportivos, de forma que se garanta a maniobrabilidade das embarcacións.
