Recursos de Galicia achega Mondigo Beneficia á veciñanza con visitas aos concellos da contorna
O conselleiro delegado de Recursos de Galicia, Emilio Bruquetas, visitou esta mañá distintos núcleos dos concellos de Barreiros, Trabada e Ribadeo, situados na área de influencia do parque eólico de Mondigo. A xornada enmárcase na estratexia da empresa para promover a transparencia e o contacto directo coa cidadanía tras a adquisición da instalación e o lanzamento do programa Mondigo Beneficia.
Durante a visita, Bruquetas estivo acompañado pola alcaldesa de Barreiros, Ana Belén Ermida, e polos alcaldes de Trabada e Ribadeo, Rubén García e Daniel Vega, respectivamente. Xuntos percorreron varias zonas incluídas no perímetro de bonificación para informar á veciñanza sobre o funcionamento das axudas na factura eléctrica e coñecer de primeira man as súas demandas.
O responsable da compañía destacou que “Mondigo debe ser un exemplo desta nova política eólica baseada en beneficios directos para a cidadanía”, ao tempo que explicou que nos últimos días se incorporaron modificacións para ampliar o alcance das vantaxes.
Desde este luns xa está dispoñible a web para tramitar os descontos, mentres que a partir do 30 de marzo habilitarase un servizo presencial de asesoramento nos concellos. A empresa asegura que a iniciativa permitirá que a enerxía producida reverta no territorio con medidas concretas para a veciñanza.