Récord de participación no IV Concurso de Marchas Procesionais Blas García Liz
O IV Concurso de Composición de Marchas Procesionais Blas García Liz, promovido polo Concello de Viveiro, a Banda de Música O Landro e a Xunta de Cofradías da Semana Santa, pechou recentemente o prazo de presentación de obras cunha cifra histórica: 29 marchas presentadas por 19 compositoras e compositores de once provincias españolas —Alacante, Cádiz, Castellón, Xaén, Madrid, Málaga, Murcia, Pontevedra, Sevilla, Toledo e Valencia—. Estes datos confirman non só o alcance nacional do concurso, senón tamén o prestixio artístico que gañou en apenas catro edicións.
O alto nivel de participación reflicte a confianza dos creadores nun proxecto que aposta pola composición contemporánea de calidade, o rigor musical e a relación entre tradición, música e patrimonio. Cada edición converte ao certame nun motor de creación de novas marchas procesionais, enriquecendo directamente o patrimonio musical ligado á Semana Santa de Viveiro.
O xurado, composto por David Rivas, Fernando Buide e David Fiuza, profesionais de recoñecido prestixio en composición, interpretación e dirección, iniciará nos próximos días a valoración das obras. A marcha gañadora será comunicada directamente aos autores por teléfono e correo electrónico, e farase pública a finais de xaneiro de 2026 a través das canles oficiais e redes sociais. A peza estrearase no Programa de Difusión Cultural Adral a cargo da Banda de Música “O Landro” de Viveiro.
A organización destacou o papel decisivo das tres entidades promotoras. Grazas á colaboración estable entre o Concello, a Banda e a Xunta de Cofradías, o concurso consolidouse como unha iniciativa estratéxica para a proxección cultural da cidade, situando a Viveiro como un foco activo de creación musical contemporánea vinculada á tradición procesional.
O certame tamén supón unha achega directa ao patrimonio cultural inmaterial da Semana Santa de Viveiro, declarada Festa de Interese Turístico Internacional, xerando un legado musical que enriquecerá as celebracións futuras. Cada nova marcha integrada no concurso refuerza a identidade cultural da vila e amplía a súa proxección exterior.
Finalmente, a organización trasladou o seu agradecemento a todos os participantes pola calidade das obras e pola confianza depositada, subliñando que este récord de participación constitúe a mellor mostra do éxito e da consolidación nacional do Concurso de Marchas Procesionais Blas García Liz.