Puerto de Celeiro fomenta a educación ambiental entre o alumnado co seu concurso sobre pesca e sustentabilidade
A Organización de Produtores Pesqueiros Puerto de Celeiro (OPP-77) continúa co seu compromiso coa educación ambiental e a sensibilización da mocidade sobre a importancia de protexer os ecosistemas mariños. Con motivo do Día Mundial do Medio Ambiente, celebrou unha nova edición do seu concurso escolar anual, en colaboración co CEIP de Celeiro, centrado este ano na creación de relatos –escritos ou gráficos– arredor da pesca e a conservación do medio mariño.
A actividade, dirixida ao alumnado de 5º e 6º de Primaria, tiña como obxectivo combinar creatividade, coñecemento e conciencia ecolóxica. O xurado, que escolleu os traballos premiados o pasado 18 de xuño, recoñeceu a calidade e a imaxinación dos participantes en dúas categorías: orixinalidade e técnica.
Na categoría de orixinalidade, os premiados foron Paula Gil Fernández, de 6º de Primaria, polo relato Porto de Celeiro; Gael Rego Ríos, de 5º, por Os Supermichis e o Pescado Roubado; e Lucía Yen Docampo, tamén de 5º, por Lucía e o Mar de Celeiro. Na categoría de técnica, os galardóns recaeron en Nira Vieira Fernández, de 5º, por Un mar azul; Sonia Mora Seijo, de 5º, por O peixe do Porto de Celeiro; e Antón Ventoso Freán, de 6º, por O golfiño perdido.
Como galardón, os seis rapaces recibirán unha cámara de fotos, coa que poderán inmortalizar o porto de Celeiro e a súa contorna mariña, desenvolvendo así tamén unha mirada artística e documental sobre o seu entorno.
O certame abriuse o 5 de xuño, coincidindo coa conmemoración do Día Mundial do Medio Ambiente. Nesa mesma xornada, a OPP-77 organizou no colexio unha xincana ambiental e un obradoiro de cociña, nos que se transmitiron valores como o traballo en equipo dos mariñeiros e a importancia dunha alimentación equilibrada con peixe local como base da dieta.
A entrega de premios terá lugar o vindeiro 26 de xuño. Durante o acto, tamén se lle entregará ao CEIP de Celeiro un lote de libros de temática mariñeira como mostra de agradecemento pola súa colaboración e implicación.
Estas accións forman parte do Plan de Produción e Comercialización (PPeC) 2025 da OPP-77 e están cofinanciadas pola Xunta de Galicia e o FEMPA. A través desta liña educativa, Puerto de Celeiro reforza o seu compromiso coa sustentabilidade e achega ás novas xeracións á cultura mariñeira e aos valores dun modelo pesqueiro respectuoso co medio ambiente.