PSOE e BNG de Viveiro chegaron a un acordo de Goberno en coalición
PSOE e BNG de Viveiro chegaron a un acordo de Goberno en coalición para os vindeiros catro anos, coa socialista María Loureiro na Alcaldía e Míriam Bermúdez na Tenencia de Alcaldía.
O PSOE levará as áreas: Alcaldía, Facenda, Turismo, Cultura, Deportes, Xuventude, Servizos Sociais e Inmigración, Seguridade Cidadá, Educación, Mar e Conservatorio.
O BNG dirixirá as áreas: Tenencia de Alcaldía, Oras e Infraestruturas, Parques e Xardíns, Mobilidade e Accesibilidade, Emprego e Promoción Económica, Medio Ambiente, Medio Rural, Mercados e Comercio.
O goberno bipartito ofreceu a Por Viveiro a posibilidade de formar parte do Goberno, mais "os independentes Bernardo Fraga e Manolo Galdo decidiron apartarse e non entrar, asegurando que facilitarán a gobernabilidade de Viveiro baixo o acordo de PSOE e BNG nos vindeiros catro anos", din os nacionalistas viveirenses.
María Loureiro e Míriam Bermúdez valoran positivamente o acordo asinado que supón o inicio dunha nova etapa cun novo goberno, que traballará para atender coa man tendida á veciñanza e coa máxima transparencia..
O goberno bipartito valorou a necesidade de traballo e proxectos que precisa Viveiro, estudando un acordo que permita mellorar a capacidade de traballo que require un Concello como Viveiro, con multitude de servizos públicos e unha elevada dispersión poboacional.
Aínda que a lei predispoña e permita 7 dedicacións para Viveiro, o bipartito acordou nesta nova etapa de goberno un total de 4 dedicacións exclusivas, pois tanto PSOE como BNG estiveron dacordo en axustar os seus soldos para poder liberar unha persoa máis sen que esta supoña un incremento nos gastos municipais.
