Prieto e Cordeiro tratarán sobre os círculos invisibles nunha conferencia en Cervo
O 30 de outubro o Museo Histórico de Sargadelos acollerá unha conferencia dos arqueólogos Pilar Prieto e Luis Cordeiro organizada por Mariña Patrimonio
Esta actividade, que conta coa colaboración da Área de Cultura da Deputación de Lugo, terá lugar ás 18:00 na Casa da Administración do Museo.
Os círculos, sobre os que Pilar Prieto e Luis Cordeiro levan anos investigando, son un tipo de xacementos arqueolóxicos dos que se comezou a ter noticia da súa existencia en Galicia a partir da escavación de A Roda de Barreiros en 2006. Na Mariña, ademais de A Roda de Barreiros, figuran no catálogo de bens patrimoniais da Dirección Xeral de Patrimonio as estruturas circulares de A Mourisca de Cervo e a Lavandeira de Xove, descubertas pola asociación Mariña Patrimonio en 2014 e 2015 respectivamente.
Este tipo de xacementos arqueolóxicos, que se están descubrindo ultimamente por todo o territorio galego, constitúen unha auténtica novidade no panorama arqueolóxico de Galicia.