Presentado Pablo Vizoso como alcaldable do BNG a Ribadeo
Onte foi o acto de presentación de Pablo Vizoso como futuro alcalde de Ribadeo liderando unha candidatura do BNG reforzada, "que combina experiencia e renovación, e que permitirá ao concello seguir na senda de progreso e de futuro", dixo a portavoz nacional, Ana Pontón.
“Pablo será un extraordinario alcalde porque ten experiencia, porque é unha unha persoa seria, rigorosa, na que confiar; os veciños e as veciñas saben que terán no seu próximo alcalde unha persoa resolutiva, próxima, coa que poder falar, dialogante. A veciñanza sabe que vai poder contar co seu alcalde, que estará ao seu carón buscando e aportando solucións”, resaltou, “será un extraordinario alcalde porque aprendeu do mellor”, subliñou a líder do BNG en relación a Fernando Suárez, o até agora rexedor de Ribadeo, nunha intervención na que tamén tivo palabras de recoñecemento para a ex concelleira Mariluz Álvarez.
Con Pablo Vizoso como alcalde, “Ribadeo seguirá avanzando e mellorando, cunha equipa reforzada que combina experiencia e renovación. Aí estará Mónica (Freire), aí estará Vicente (Castro)”, destacou a líder nacionalista, citando a dúas das persoas que integran a candidatura do Bloque de cara á cita electoral do 28 de maio.
“Queda moito, moito porvir para este concello da man dun BNG con máis ganas que nunca, con forzas renovadas para un gran obxectivo: que Ribadeo siga avanzando, que siga sendo o gran referente da Mariña é un dos grandes concellos de Galiza”, proclamou. Pontón destacou que Ribadeo é hoxe “un concello orgulloso da súa identidade, exemplo de rehabilitación urbana, referente en servizos, cun patrimonio arquitectónico e natural espectacular con dinamismo económico e social”.
Neste sentido, a portavoz do Bloque fixo referencia a unha das grandes infraestruturas sociais coas que conta o concello, a residencia da terceira idade: “Non vou enumerar todos os logros e avances postos en marcha polo goberno do BNG, porque non acabaría nunca, pero permitídeme que cite un que da a medida do que somos capaces: a residencia de maiores de Ribadeo, a única residencia pública posta en marcha en Galiza en catorce anos, a única. E sen un só euro da Xunta!”, destacou.
A líder nacionalista puxo Ribadeo como exemplo da capacidade de goberno do BNG, do modelo de éxito dos gobernos municipais do Bloque, capaz de facer avanzar os concellos que lidera e de transformalos en vilas e cidades con oportunidades, con benestar social, con calidade de vida.
Modelo de goberno de éxito
“En Ribadeo o BNG demostrou do que somos capaces, demostrou que sabemos gobernar coma ninguén e este concello é un exemplo do modelo de éxito dos gobernos municipais do BNG, gobernos de calidade que saben xestionar cada euro con eficacia; gobernos solventes, con capacidade para transformar en positivo e mellorar a vida das persoas; gobernos que fan que os concellos prosperen, que teñan dinamismo económico e social; gobernos con ideas para encarar os grandes retos de presente e de futuro”, salientou.
Resultado histórico o 28M
En concellos como Ribadeo, o BNG demostra que hai outra maneira de gobernar, que as cousas se poden facer ben neste País, indicou, “e con ese aval presentámonos o próximo 28 de maio ante a cidadanía, unhas eleccións nas que imos ter un resultado histórico, nas que imos ser a forza política que máis suba, unhas eleccións que serán un gran paso adiante para abrir un tempo novo en Galiza e darlle a este País, por primeira vez, un goberno liderado polo BNG e cunha presidenta coas mans libres”.
“Tedes a miña palabra de que ese goberno será un aliado incondicional de Ribadeo, e que lonxe de poñer paus nas rodas, remará na mesma dirección e sumará ao gran traballo que vai facer o Pablo como alcalde e todo o seu equipo a favor deste concello e da súa veciñanza”, proclamou.
Momento de retos ante a crise
Na súa intervención, Pontón tamén fixo referencia ao contexto complexo, no medio dunha crise de prezos que soben máis en Galiza, pese a ter salarios por debaixo da media e as segundas pensións máis baixas de todo o Estado. Por iso, o Bloque vai seguir presentando alternativas viábeis para unha saída galega e xusta a esta crise, como a defensa dos servizos públicos, particularmente a sanidade.
“Porque, fronte ao PP que leva trece anos de recortes e privatizacións, o BNG defende a sanidade pública, porque temos dereito á saúde con independencia dos cartos que teñas na conta corrente”, subliñou. Alternativas xustas, porque fronte ao espólio éolico que promove o PP “para que as eléctricas se sigan forrando”, o BNG defende a tarifa eléctrica galega para abaratar a factura da luz as familias e as empresas, “que para algo estamos nun país rico en electricidade”, explicou.
Alternativas sociais e xustas, afondou, tamén ante a subida das hipotecas. 175.000 familias teñen unha hipoteca que sobe de media 250€, mentres a banca ten beneficios obscenos. O BNG propón un plan de rescate hipotecario pagado pola banca para axudar as familias hipotecadas con menos ingresos. “Se se pudo gastar 90.000 M€ no rescate bancario por que non ás familias?”, interpelou.
“Galiza precisa un cambio de rumbo e estou segura de que o próximo 28M imos dar importantes pasos adiante para conseguilo, imos seguir traballando con rigor, con humildade sabendo que somos a esperanza de moitos galegos e galegas para construír esa outra Galiza posible, concello a concello”, concluíu.
