Presentado o programa de Expomar 2023
A Fundación Expomar presentou na mañá do 27 de abril os detalles da próxima XIX Feira Monográfica Náutico-Pesqueira Expomar 2023. No acto, ademais de presidente e xerente da Fundación Expomar, Alfredo Llano e José M. González ‘Brais’, participaron Antonio Basanta, director xeral de Pesca, Acuicultura e Innovación Tecnolóxica da Xunta de Galicia; Mayra García Bermúdez, deputada provincial de Lugo responsable da área de Economía; e Sergio López, xerente da Organización de Produtores Pesqueiros do Porto de Burela.
O xerente de Expomar, José M. González ‘Brais’, presentou todos os detalles da inminente feira, que do mércores 10 ao sábado 13 de maio ocupará a nave de redes do porto de Burela e unha nova carpa anexa coa que a superficie de exposición superando os 5.000 metros cadrados.
En canto ao programa da feira, que inaugurará a consellerira do Mar da Xunta de Galicia, Rosa Quintana, destaca a celebración por segunda edición consecutiva do pleno do Consello Galego de Pesca, que o mércores 10 de maio cambiará este ano a súa habitual sede en Santiago para reunirse en Burela dentro do marco de Expomar 2023.
O venres pola tarde presentarase o documental “Morabenza”, obra do director burelense David Mon, recentemente premiado co Premio Mestre Mateo 2023.
Ao longo dos días da feira tamén se poderá visitar a exposición “A Mariña Sumerxida” con fotografías de Carlos Gil e Hugo Fernández, patrocinada polo GALP A Mariña Ortegal, que se poderá visitar dentro do denominado “Espazo Abanca”, que acolle tamén o punto de encontro de profesionais e a zona de restauración.
Entre o mércores 10 e e sábado 13 tamén se celebrarán xornadas de portas abertas en diferentes embarcacións amarradas no porto de Burela, como o Barco Museo Boniteiro Raíña do Carmen, do Concello de Burela; o Sar Gavia, de Salvamento Marítimo; ou as patrulleiras Río Paz e Río Luna, da Garda Civil, esta última construída recentemente en Estaleiros Armón Burela.
Dentro das actividades paralelas á feira, destaca o recoñecemento á Confraría de Pescadores de Burela, membro da Fundación Expomar, que este ano celebra o seu 100 aniversario. O acto terá lugar nos actos do sábado 13 de maio, antes de clausúraa , que correrá a cargo do presidente da Deputación de Lugo, José Tomé.
Como cada ano, o programa da feira complétase coas tradicionais Xornadas Técnicas e Encontro Empresarial, que nesta edición celebrarán as súas edicións número 30 e 24.
O xerente de OPP-7 Porto de Burela, Sergio López, foi o encargado de presentar en detalle estas citas.
O Encontro Empresarial de Organizacións Profesionais celebrarase na mañá do xoves 11 de maio as instalacións de Armadores de Burela, reunindo de novo ás entidades máis representativas da frota galega e outras asociacións nacionais.
Como é habitual, as Xornadas Técnicas celebraranse no salón de actos da Confraría de Pescadores de Burela e dividiranse en dous días. A primeira xornada, que terá lugar na tarde do xoves 11, tratará sobre “Xestión Pesqueira”, con especial atención ás leis de pesca marcadas pola Unión Europea. A segunda xornada, na mañá do venres 12, “Socio Economía” versará sobre temas máis sociais, de comercialización e alimentación.
A deputada provincial de Lugo responsable da área de Economía, Mayra García, agradeceu o esforzo que se realiza desde Expomar durante todo o ano e destacou a importancia que o sector da pesca e a náutica teñen non só para A Mariña, senón para toda a provincia de Lugo.
O director xeral de Pesca, Acuicultura e Innovación Tecnolóxica da Xunta de Galicia. Antonio Basanta, volveu poñer de manifesto a aposta tan decidida que desde a Consellería do Mar faise con esta feira, poñendo en valor o traballo da Fundación Expomar, que tres décadas despois consegue que a súa feira siga indo a máis cada ano. Desexou que sexa unha edición frutífera para todos os participantes, entre os que tamén se atopa el mesmo, xa que moderará a segunda xornada técnica.
Finalmente, o presidente da Fundación Expomar e alcalde de Burela, Alfredo Chairo, puxo o seu foco no “orgullo” do sector pesqueiro local: “Burela merécese ter unha feira como Expomar, porque aquí é onde mellor péscase”. O presidente de Expomar puxo en valor ás xentes do mar, “que aquí apostan moi duro polo sector náutico
pesqueiro”, e á frota de Burela, que se caracteriza especialmente polas pesqueiras selectivas, como a pescada do petisco.
O alcalde burelense recoñeceu que xa se botaba de menos á feira Expomar, catro anos despois tras o parón da pandemia, e destacou que nesta feira o protagonismo será, por encima de todo, para o sector náutico pesqueiro.
Mentres tanto, no porto de Burela xa se multiplican as tarefas para que a nave de redes acolla en menos de dúas semanas a 19ª edición da feira monográfica náutico pesqueira Expomar 2023.
